Os Infantís "No seu mellor momento da tempada"

Os Infantís

"No seu mellor momento da tempada"

Rubén V. (Chicolas) xunto con parte da plantilla do equipo de infantís, e que tan bos resultados esta a sacar, nun encontro desta tempada. 

Atlco Fátima, S.D. Compostela, La salle e Bodegón Arzúa son por esta orde, e a falta de catro xornadas para rematar a competición, os catro primeiros clasificados na liga de infantís de 2ª autonómica Grupo 4. 

Sabiamos que este equipo ten moi bos xogadores e apertándoos un pouco podían facer unha boa tempada como así está a ser para eles.

Ademais de pasalo ben xogando ao fútbol, están a competir a un bo nivel, ante equipos de gran talla como son os que encabezan a táboa, e aos que non fomos capaces de derrotar, tanto nos partidos disputados na ida, coma na volta e se queremos gañar e aspirar a algo temos que ser capaces de gañar a calquera rival. Iso é o que que marca a diferenza entre ser un bo equipo ou ser o mellor.

De todos os xeitos estes xogadores e o seu adestrador Rubén Varela están a facer unha magnífica tempada e cumpren coas expectativas que nos formularamos con eles a principio da mesma e onde sabiamos que o terceiro ou cuarto posto ía ser polo que tiñamos que loitar.

Agora só quédanos rematar a tempada igual de tranquilos que nestes momentos, e aproveitar estes partidos para chegar á Copa de Santiago no mellor momento de forma e onde nos imos volver enfrontar a algún destes rivais tan duros.

Por iso temos que aprender dos nosos erros e aproveitalos para non os cometer cando comece a disputarse a Copa, e así desta forma, poidamos facer un bo papel nesta.

Presidente e os membros do equipo tomando un tente en pé ao remate do encontro.

Pero como ben dicimos o máis importante é a amizade, o compañeirismo, e a unión  do grupo dentro e fora do campo, para que este poida traballar, render, e sobre todo sentir as cores do escudo deste, ainda que humilde, grande equipo que defenden.

Os Cadetes: "Esgotan As Suas Posibilidades"

Os Cadetes

Esgotan As Suas Posibilidades

Aínda que o equipo mostrou unha melloría considerable no seu xogo durante esta segunda volta, e durante moitas xornadas estivemos a rozar a salvación, con posibilidades moi claras de seguir nesta categoría, que tanto nos custou conseguir e manter durante estes tres anos que estivemos nela. O equipo non foi capaz de estar aí nos partidos decisivos contra rivais directos na loita por manter a praza nesta categoría.

Evidentemente cando comezamos a liga nesta categoría, xa tiñamos moi claro que o noso reto era intentar aguantar a categoría, e que as nosas aspiracións para estar arriba na clasificación ían ser escasas. 

Nunha liga onde o nivel de xogo é bastante máis esixente que na 2ª Autonómica e os equipos que están nela teñen bastantes máis recursos ca nós.

De todos os xeitos non debemos ver só o lado negativo e valorar moi positivamente a actitude mostrada por todo o equipo que se mantivo unido xornada a xornada disputando con ganas cada encontro e sen engurrarse ante ningún rival.

Por iso tamén debemos destacar o traballo de Manuel o seu adestrador e felicitalo polo ben que soubo levar os seus xogadores nesta tempada tan dura para eles. 

El foi o primeiro que coa súa actitude, soubo dar exemplo para que todos e cada un dos compoñentes do equipo se mantivesen unidos toda a tempada.

É doado sacar peito cando as cousas van ben, pero é nestas situacións onde a experiencia e a personalidade se fan valer e deben ser tidas en conta.

Por iso o mais importante, é que o grupo segue unido e coa afección sempre ao seu lado e á que tamén, queremos agradecer e felicitar o apoio mostrado ao grupo durante toda a tempada.

E como nunca nos cansaremos de dicir, somos o Bodegón Arzúa, un equipo afeito a sufrir e a loitar. Así imos continuar sempre ao lado de todos e cada un dos nosos equipos, tanto nos triunfos coma nas derrotas.

Os Modestos "LOITANDO ATA Ó FINAL"

Os Modestos

LOITANDO ATA Ó FINAL

O equipo que realizou un partido impecable ante o Portomouro C.F. a semana pasada ao que derrotaron por 4-1, esta xornada enfrontouse  ao Vista Alegre C.F. noutros noventa minutos de máxima emoción.

Tras chegar ao minuto vinte da segunda metade con empate a un no marcador, o árbitro do encontro, que ata entón tivo unha actuación máis que aceptable no partido, cometeu un erro clamoroso anulando un gol por fóra de xogo ao Bodegón, cando realmente o xogador estaba en posición legal, e como logo recoñocería o seu máis que posible erro o colexiado ao final do encontro.

Nós non imos entrar en polémicas arbitrais, pero seguramente non ter sumado estes tres puntos tan importantes nesta xornada, poida ter unha repercusión bastante grave ao final da liga para o que son nosos obxectivos.

De tódolos xeitos non podemos lamentarnos do acontecido, e o que temos que facer, é xa pensar na próxima xornada, e en conseguir unha nova vitoria.

É evidente que o equipo está demostrado unha melloría máis que notable nestas últimas xornadas. Aquí deixámosvos un resumo do que foi o partido contra o Portomouro C.F. e ao que o Bodegón derrotou por 4-1 hai dúas xornadas.

Video do partido

Peña bodegón Arzúa - Portomouro C.F.

VER VÍDEO DO ENCONTRO