JESÚS CARRIL, PRESIDENTE DO CLUB.
14 de diciembre de 2014
16 de noviembre de 2014
Os Cadetes: Loitando na cabeza da Táboa.
Os Cadetes:
Loitando na Cabeza da Táboa.
Equipo de cadetes que disputou o encontro contra o Amio C.F.
Un bo equipo, que xornada tras xornada, afiánzase nos primeiros postos da liga tras o Victoria C.F. e o Bertamiráns C.F. E con claras aspiracións a disputar cando menos, unha praza para xogar a promoción da fase de ascenso a 1ª Autonómica
Pero para iso debemos seguir traballando como ata agora, e plantexando partido a partido para tentar manternos nunha desas tres prazas. Aínda queda moita liga e poden pasar moitas cousas. A medida que trascurren as xornadas nótase que o equipo evoluciona favorablemente tanto no xogo como fisicamente.
Ao contar cun platel bastante amplo, e ter a posibilidade de facer rotacións cada xornada, obriga aos xogadores a traballar máis duro en cada adestramento, para non verse fóra na lista de convocados.
A medida que os xogadores van crecendo e subindo de categoría hai que irlle pedindo metas e sacrificios maiores, tanto a nivel individual como de equipo, que deben quedar reflectidos no campo con actitude e ganas dentro e fora do terreo de xogo.
Esta xornada enfrontámonos ao lider nun partido no que saímos derrotados, e onde influíu máis a nosa falta de convicción para poder gañar, que polos méritos que fixo o noso rival.
O primeiro que temos que saber é que este platel, esta formado por grandes xogadores capaces de competir contra calquera equipo por grande que sexa, e así é como debemos saír ao campo cada xornada, unicamente confiando en nós mesmos e facendo ben as cousas como ata agora.
A vindeira xornada enfrontámonos no seu campo, a outro gran rival, que loita do mesmo xeito que nós, por estar aí entre o tres primeiros da liga como é o Bertamiráns C.F. Debemos terlle respeto como gran equipo que é, pero nunca medo ou temor a perder. Si facemos as cousas ben e xogamos como sabemos podemos derrotar a calquera equipo de esta liga.
Agora toca volver adestrar, analizar os erros cometidos contra o Victoria esta xornada, e aprender deles para que non se volvan repetir en próximas xornadas. Temos que ir partido a partido e tentar ceder o menor número de puntos posibles, si queremos ter opcións de facer algo importante este ano
O equipo de cadetes ao remate dun encontro.
Pero ante todo debemos ter en conta que somos un grupo unido dentro e fóra do campo e que o máis importante é gozar xogando ao fútbol cos amigos e das cousas que un fai.
28 de octubre de 2014
Os Modestos: Loitando coas ideas moi claras.
Os Modestos:
Loitando Coas Ideas Moi Claras
Equipo de modestos que se enfrentou o Silleda C.F. a xornada pasada.
Os modestos empezan a mostrar a súa mellor cara na primeira rolda desta liga atípica, na que levan disputados nove encontros e tan só perderon un, empatado tres, e gañado cinco. Sen dúbida están a facer as cousas bastante ben e nestes momentos ocupan o sexto posto da clasificación.
O equipo esta formado por unha plantilla bastante ampla, e con novas incorporacións que están a achegar o seu graniño de area para que este bo grupo vaia cara arriba.
A estas alturas de tempada podemos dicir que o equipo mellorou moito en defensa con respecto á tempada pasada, pois é dos catro menos goleados da táboa, pero segue faltándonos conseguir algún gol máis nos encontros.
Así nalgún dos empates acadadados, desperdiciamos ocasións suficientes como para ter levado os tres puntos. De todos os xeitos o noso obxectivo é camiñar partido a partido facendo o fútbol que sabemos, e cumprindo os obxectivos desta primeira fase, que é sumar o maior numero de puntos posibles, coa idea de ter todas as posibilidades intactas de cara á segunda fase.
Que será unha liguiña de dous grupos formada por doce equipos, e dos que saldrá de cada grupo un equipo o 1º, que ascende directo e o 2º, 3º 4º 5º de cada grupo, xogaranse a fase de ascenso entre eles.
Está claro que o Atl. Melide é con diferenza nestes momentos o equipo máis forte da competición pois fixo un desembolso económico importante fichando xogadores para levar este equipo a categorías superiores.
Esta fin de semana enfrontámonos a el, e será unha boa referencia para saber dentro da nosa humildade económica a que nivel estamos con respecto a este gran equipo. A calidade de un equipo non se demostra no banco senon no campo e nos imos tentar poñerlle cando menos as cousas difíciles o lider.
Así mesmo tamén debemos aprender dos nosos erros e non cometer os que cometemos ante o Silleda na anterior xornada, onde non puidemos pasar do empate ante este equipo que é moi irregular no seu xogo, e ocupa as parte baixa da táboa.
De todos os xeitos estamos contentos de como está transcorrendo as cousas este ano para o equipo de modestos, que xa lles tocaba un pouco de tranquilidade interna, e oxalá poidan darnos algunha que outra alegría como nos teñen afeitos a toda a xente, que os seguimos e apoiamos desde a bancada.
26 de octubre de 2014
OS XUVENÍS: CON MÁIS CORAZÓN QUE CABEZA
OS XUVENÍS
CON MÁIS CORAZÓN QUE CABEZA
Álvaro e Toni
Os xuvenís non acaban de asentarse na competición ligueira, despois da brillante pretempada realizada nos meses de agosto e setembro.
Josiño e Brais
De momento dúas derrotas e dous empates, son os resultados conseguidos, e que están moi lonxe dos que esperamos deste grande equipo.
Juli e Oscar
Sen medo a equivocarnos, podemos dicir que o grupo conta entre os seus compoñentes co mellor da liga nesta categoría.
Xoán
Os infortunios acontecidos no primeiro partido de tempada fronte ao C.D. Belvís, pensamos que puideron influír notablemente nos partidos disputados a continuación.
Yago
Pois dese encontro saímos coa lesión de Yago (foto superior) que é un dos nosos referentes na punta de ataque e a de Sergio (foto inferior) que é un grande central. Dende o Club enviámoslle todo o noso apoio e cariño, así como o desexo dunha pronta recuperación.
Sergio
Evidentemente o equipo non atravesa polo seu mellor momento de xogo, na que como dicimos xoga máis co corazón que coa cabeza, o que os leva a cometer erros que non son propios da calidade destes xogadores.
Charlie detendo un penalti.
Boa proba diso tivémola neste último partido de liga fronte ao Milladoiro C.F. onde comezamos perdendo tres goles a un, pero o equipo non se veu a baixo, e mesmo se puxo por diante no marcador.
Brais
Pero outra vez as ansias fixéronnos cometer imprecisións, e rematamos empatando un partido, que en condicións normais debiamos ter gañado sen problemas.
Manolo e Jose
Está claro que algo non estamos a facer ben, evidentemente é algo que nos preocupa, o corpo técnico sábeo, e niso están a traballar para levar o equipo a bo porto.
Alex
De todos os xeitos o grupo está unido, é consciente do seu potencial e está a poñer todo da súa parte para volver ao camiño que nos marcamos, e do que non debemos saír se queremos estar aí diante na liga.
A mellor noticia desta xornada e a de que nos alegramos moito, é que despois da súa lesión que o tivo apartado da competición seis meses, Chechu (na foto) volve aos terreos de xogo para disputar os encontros de novo ao lado dos seus compañeiros. Esta xornada xogou os seus primeiros 30 minutos de liga e mostrou como sempre unha grande entrega para o grupo.
6 de octubre de 2014
Os Cadetes: Loitando Dende o Primeiro Partido
Os Cadetes
Loitando Dende o Primeiro Partido
Os cadetes adestran duro para afrontar a súa terceira xornada de liga, que de momento non puido ter mellor comezo, pois contan xa con dúas vitorias no seu haber.
Ademais fronte a dous grandes equipos e moi importantes, como son o Atlético Fátima ao que derrotaron por 5 -2, e a S.D. Compostela, á que tamén venceron por 0 -3.
Todo isto non fixo mais que empezar, a liga é longa, e quedan moitas cousas por acontecer. Estes partidos teñen que servirnos para coller a suficiente confianza dentro do grupo, e para saber que podemos competir contra calquera rival por duro que sexa.
Este equipo ten un plantel amplo, e con xogadores de calidade, que nestes partidos tanto de pretempada coma de liga demostraron ter boas maneiras na súa forma de xogo.
Miguel (na foto) falando ao remate do encontro con dous xogadores da S.D.,foi o autor de dous dos tres goles conseguidos fronte á S.D. Compostela.
Rubén e Jose (1º e 2º adestrador respectivamente) serán os encargados esta tempada, de facer que este equipo de cadetes evolucione positivamente, tanto no seu xogo, como na consecución de resultados favorables.
23 de septiembre de 2014
COMEZA A NOVA TEMPADA: 2014 - 2015
COMEZA A NOVA TEMPADA
2014 - 2015
Comeza a rodar unha nova tempada e o Bodegón Arzúa volve de novo á competición. Este ano saímos con tres equipos, un na categoría de cadetes, outro en xuvenís e por último na de afeccionados (ou modestos). Tamén estamos a estudar a posibilidade de facer un de fútbol sala na categoría infantil.
A falta de nenos que se incorporen a categorías inferiores como alevíns, benxamíns... é un feito que se está notando en todos os clubs de Santiago, e polo tanto leva consigo á desaparición de moitos equipos nestas categorias.
Tamén nas categorías superiores, onde a falta de presuposto por falta de patrocinadores, e as axudas que son cada vez menores, fan que as ligas se vexan minguadas no número de equipos que participan nelas.
Este é o motivo polo que as categorías de cadetes e xuvenís atrasaron o comezo da tempada, e así evitar desta forma, que non existan tantas xornadas de descanso como na tempada pasada.
No caso dos modestos a retirada de equipos dos distintos grupos da zona, provocou a fusión destes nun só, e polo tanto creouse unha liga, un pouco atípica, con un único grupo formado por 23 equipos que terán que enfrontarse nunha primeira volta todos entre todos, e os doce primeiros clasificados, entraran nunha liguilla para a fase de ascenso.
O equipo de modestos que mantén este ano exactamente o mesmo equipo do ano pasado, verá reforzada a súa estructura, coa incorporación de novas fichaxes, tanto no terreo deportivo como técnico.
O único que lle desexamos a este equipo é que teña unha tempada tranquila sen altibaixos, e que poidan disfrutar xogando ao fútbol como eles saben.
Só con iso creemos que será suficiente para que cheguen os bos resultados, e ver a posibilidade de estar aí a loitar por volver ascender a unha categoría que non merecemos perder a pasada tempada.
Para eles a liga comezou hai tres semanas, e de momento as cousas non pintan nada mal, disputaron tres encontros e gañaron dous.
Nótase que o equipo vai en progresión e a medida que pasen as xornadas seguro que o imos ver dando aínda moito mais.
No caso dos xuvenís como xa comentamos, tamén presenta un equipo bastante amplo, con novas incorporacións que veñen para reforzar o bloque que mantemos do ano pasado.
Deste grupo tamén imos estar moi pendentes, pois se logra adaptar as novas fichaxes, e mantén o nivel de xogo que vimos nos partidos de pretempada, podemos ver un equipo, para estar a loitar cos todo poderosos do grupo, e que nos dean algunha que outra alegría.
E por último pero non menos importante, senón mais ben todo o contrario, toca falar dos cadetes, este equipo está formado por vinte e tres xogadores.
Parte proceden do grupo que xa tiñamos da tempada pasada e aos que temos que sumar os infantís do grupo do ano pasado que soben de categoría, asi como as novas incorporacións procedentes doutros equipos, e que tamén seguro, achegarán cousas importantes a este grupo tan nutrido de xogadores.
Este equipo foi o que fixo menos pretempada, o que unido á incorporación de novos xogadores ao grupo, fai que se lles estea a notar máis nestes partidos amigables que disputou, pois a fluidez no seu xogo ainda ten que mellorar bastante.
Pero do que si estamos seguros é que o equipo conta cun nivel moi alto de calidade entre os seus xogadores, e eles teñen que ser tamén conscientes de que se poñen ganas, e ilusión poden tamén darnos moitas alegrías esta tempada.
A medida que transcorran as xornadas irémosvos presentando a todos os xogadores de cada un dos equipos que temos en cada categoría, e do que lles aconteza durante a tempada.
Suscribirse a:
Entradas (Atom)