Os Modestos: A Liga Ponse Costa Arriba

Os Modestos:

A Liga Ponse  Costa Arriba

Entramos na parte final dunha liga que está a ser moi disputada na parte alta da táboa, e onde os seis primeiros clasificados marcan diferenzas importantes con respecto aos demais equipos en competición.



Pero a pesar de todo, co paso das xornadas vanse clarificando tamén as cousas entre os equipos que de verdade aspiran ao titulo de liga.

 

 

Está claro que a liga é o título á regularidade e neste sentido Sta. Cruz de Montaos e Calo,  están a ser os equipos máis regulares e por iso comparten a cabeza da taboa separados tan só por un punto.

 

O terceiro posto é para o Fátima que está a facer unha segunda volta impecable e isto sérvelle para colocarse a tan sólo tres puntos do líder e ser a alternativa entre os dous primeiros clasificados.

 

O Viduído e o Deixebre, ocupan a cuarta e quinta posición respectivamente a cinco puntos da cabeza. Dous rivais complicados e que non dan un partido por perdido ata que o árbitro pita o final do mesmo.
 

No sexto posto temos ao noso Bodegón a seis puntos do líder, e aínda que a diferenza parece pequena, tal e como están os equipos de arriba poida que sexa unha distancia insalvable

 

  

Un comezo de liga bastante irregular con resultados desafortunados nalgún encontró, e as dúas derrotas sufridas na segunda volta contra rivais directos como son o Sta. Cruz de Montaos e o Fátima, foi o que básicamente, propiciou esta situación desfavorable na clasificación.

 

Cando perdes un partido onde te ves superado no xogo polo rival, non che queda outra que aceptar a derrota. Pero no caso do Bodegón normalmente isto non sucede así, e as derrotas que encaixamos veñen marcadas por erros puntuais no noso xogo, que logo condicionan o partido onde nós poñemos a calidade e o rival os goles, tal e como sucedeu ante o Sta Cruz de Montaos.

 

Cada vez quedan menos partidos e as nosas opcións vense reducidas, pero a nosa obrigación é competir ata o final e buscar cando menos un posto para xogar a promoción de ascenso

 

Os Modestos: Loitando Pola Liga

Os Modestos:

Loitando Pola Liga

Xa estamos en plena segunda volta da liga e como non podía ser doutra maneira, o noso equipo de modestos unha tempada máis, loitando no alto da táboa e aspirando a todo.

Sta Cruz de Montaos, Calo, Deixebre, Fátima e Bodegón, son por esta orde e neste momento os cinco primeiros clasificados. 

Tendo en conta que entre o primeiro e o quinto clasificado só hai cinco puntos de diferenza, isto dános unha idea do apertada que está a ser a loita nos postos de cabeza.

O Bodegón tras seis xornadas consecutivas sen perder, encaixou este domingo unha derrota fronte ao Viduído C.F. que nos afasta un pouco da cabeza da táboa. 

Temos que dicir que o equipo acudíu a este encontro marcado polas baixas de catro xogadores importantes, pero a pesar de todo na segunda parte do partido, desperdiciamos numerosas oportunidades como para terminar superando ao noso rival sin problemas.

Este plantel é o suficientemente amplo e a calidade dos seus xogadores incuestionable, así que todo pasa por alcanzar ese punto de mentalidade gañadora que nos falta nalgúns encontros e que nos leva a perder puntos innecesarios como o ocorrido nesta pasada xornada.

A mentalidade gañadora pasa por entender que podemos gañar a calquera equipo desta competición, que xogando con cabeza máis que con corazón, podemos superar calquera situación adversa durante un encontro. 

Non podemos cometer erros de concentración, nin entrar nas provocacións dos nosos rivais durante os encontros, isto non fai máis que cargarnos de cartóns innecesarios que comprometen ao equipo en xornadas vindeiras.

Está claro que o equipo loitará por ascender, pero este ano queremos facelo entrando pola porta grande que é gañando a liga, xusta recompensa á entrega e á humildade deste gran grupo.

Como dixemos ao comezo desta entrada a igualdade entre os equipos da cabeza da táboa é evidente e a liga será para o que menos erros cometa de aquí ao final da liga.

Os Xuvenís: Un Comportamento Admirable

Os Xuvenís 2016 / 17

Un Comportamento Admirable

Nesta entrada comprácenos en presentarvos o equipo de xuvenís para a tempada 2016 / 17. Despois de moito traballo e con gran orgullo, podemos dicir que un ano máis, o equipo de xuvenís volve saír de novo a competir na segunda autonómica do grupo 5.

Só cando estas dentro dun equipo e vives o seu día a día, daste conta do laborioso que resulta sacar un grupo adiante cada tempada e o fácil que resulta poñer peros e pegas desde a bancada o traballo dos demais.

Ao finalizar a tempada pasada algúns xogadores optaron por abandonar o club e comezar unha nova andaina noutros equipos, o que puxo en grave compromiso o futuro do equipo para esta tempada.  A pesar de todo non podemos máis que desexarlle o mellor vaian onde vaian.

Pero son os xogadores que levan o escudo do club gravado a lume no seu corazón os que sempre van estar aí dando a cara, ás verdes e ás maduras. Referímonos a grandes xogadores como Moisés, Óscar, Roberto, Torres, Jhonatan...

E como non podía ser doutra maneira, noso máis sincero agradecemento ás novas incorporacións que chegaron ao equipo aínda a pesares de todas as dificultades que se ían a atopar. 

Un equipo moi novo que para ser sincero pasouno bastante mal a principio de tempada. Pero lonxe de baixar os brazos o equipo veu a máis e as vitorias comezan a chegar.

As novas incorporacións mostraron moitos signos da súa calidade no xogo e sobre todo, do seu saber estar no campo en canto ao seu comportamento, e iso é algo que nos comprace a todos.

Sabemos que esta tempada vai ser dura e sobre todo de transición, pensando en formar unha base sólida e un pouco máis rodada, que nos permita o próximo ano afrontar a competición con metas máis altas. 

O noso obxectivo para esta tempada, é gañar o maior número de partidos posibles e terminar canto máis arriba mellor na táboa clasificatoria disfrutando de xogar ao fútbol.

Nas próximas xornadas iremos dando conta da progresión que faga este equipo e iremos coñecendo mellor a cada un dos seus xogadores.

Os Modestos: Voltan á Senda Das Victorias

Os Modestos:

Voltan á Senda das Victorias 

Estamos a piques de chegar ás Festas de Nadal e por tanto a un par de xornadas de rematar a primeira volta do campionato ligueiro.

Tras un comezo de tempada un tanto irregular en canto ao nivel competitivo do equipo e que se traduciu nalgún que outro resultado inesperado, aos poucos foi retomando o ritmo de competición e mellorando tanto no seu xogo como no seu nivel de rendemento.

 

Despois de catorce xornadas disputadas, o equipo está a tan só tres puntos da cabeza da táboa, o que nos permite manter intactas nosas aspiracións, que non son outras que tentar loitar por gañar a liga e subir a 2ª autonómica entrando pola porta grande e sen ter que xogar a promoción.

 Pero do dito ao feito hai un treito e o camiño demóstrase loitando e gañando cada partido.

 

Queda moita liga e pode pasar calquera cousa, a pesar de que algún equipo xa mostrou as súas cartas como aspirante a levar o título ligueiro.

 

O noso equipo ten un bo plantel, onde a experiencia vese moi ben complementada coa chegada da calidade e mocidade dos xogadores da canteira que achegan tamén cousas interesantes.

 

Un grupo comprometido, co mellor corpo técnico que se pode ter e unha afección entregada, fai que se reúnan todas as condicións necesarias para non ter escusas, e conseguir os retos inmediatos desta tempada que son gañar a liga e a copa. 







Os Modestos: Parece que si...



Os Modestos:

 Parece que si...



O equipo de modestos despois dun comezo de liga mais ben irregular tanto nos resultados conseguidos, como no xogo mostrado, parece que nestas últimas xornadas o grupo móstrase mais asentado no terreo de xogo, e colleu o ritmo da competición

 

Despois de tres xornadas consecutivas sen perder, parece que aos poucos o equipo empeza a mostrar a súa mellor cara, e colócase nestes momentos a cinco puntos do líder da liga.

Coa chegada dos novos reforzos provenientes da categoría xuvenil, e un par de fichaxes máis, o equipo ve reforzada o seu plantel en todas as súas liñas.

 

A calidade, a experiencia, a xuventude e sobretodo o compromiso unánime de todos os compoñentes deste equipo co escudo que defenden, fai que se convertan outro ano máis nun serio candidato a gañar a liga ou a loitar cando menos pola promoción de ascenso. 

Por todo iso debemos ser realistas e dicir claramente que non nos vale máis nada que gañar. Un equipo como este debe saír cada xornada pensando en sumar os tres puntos o mesmo tempo que disfruta xogando.

Ben é certo que esta tempada a comezamos a un nivel máis baixo que outros anos, e tamén en comparación co nivel que amosan os equipos que nestes momentos encabezan a táboa. 

A liga é longa e aínda quedan moitos partidos por disputar, e se algo temos claro é que non nos asusta ningún rival ao que teñamos que enfrontarnos e que o equipo vai dar o mellor de si en cada partido que dispute.

Se queremos estar aí arriba, non podemos permitirnos ningún tipo de erro no noso xogo, e moito menos perder puntos por iso que logo nos poidan pasar factura ao final da tempada.

Os Modestos: Comezo Irregular...

Os Modestos: 

Comezo Irregular...

Os modestos comezan a liga cun equipo realmente prometedor, que este ano vese reforzado coa chegada de grandes xogadores procedentes da canteira, e que estamos seguros achegarán moitas cousas positivas a este grupo tan consolidado.

De todos os xeitos e moi a pesar noso, temos que dicir que despois de levar disputados catro partidos nótase que ao equipo fáltalle rodaxe e a fluidez no xogo á que nos ten afeito durante estes últimos anos.

Dúas derrotas e duas victorias son os resultados conseguidos ata o momento, e aínda que gañamos o último encontro cun contundente 4-0, non debemos esquecer que no partido anterior o rival remontounos e gañou o encontro no tempo de desconto.

 

Este gran equipo, co plantel que ten, e coa calidade dos seus xogadores, non pode permitirse outra cousa que non sexa aspirar a loitar por todo esta tempada.

Queda moita liga e moitos partidos que disputar, somos un equipo afeito a loitar e a sufrir ata o último minuto. O noso obxectivo non pasa por outra cousa que loitar por ese ansiado ascenso e volver disputar a  final da Copa de Santiago.

A experiencia demostrada, a calidade e a mocidade  que teñen os xogadores en este equipo, seguro que como sempre nos fará vivir tardes de fútbol inesquecibles e por que non, celebrar algún titulo.

A vindeira fin de semana enfrontámonos a un equipo correúdo e con xogadores moi veteranos como é o Viduído C.F. Sen dúbida unha proba interesante para saber se o equipo continua cara á progresión de afianzar o seu xogo.

Tamén nos comprace comunicarvos que despois de intensas xestións e superar numerosas dificultades o equipo de xuvenís debuta en liga esta xornada, nin máis nin menos que fronte a un gran rival como é a S.D. Negreira, e do cal daremos conta do que fagan esta tempada.