Tempada 2016 - 2017:
A Pelota Comeza a Rodar
Equipo de Modestos que debutou fronte á S.D. Calo no primeiro partido de liga.
Como a vida mesma, o tempo pasa sen présa pero sen pausa, e así case sen darnos conta, comeza unha nova liga, e con ela volve a emoción de ver aos nosos equipos competir no terreo de xogo novamente.
Fronte a un rival complicado como o Calo, nun terreo de xogo moi pequeno e en bastante mal estado, o noso equipo de modestos debutou cunha derrota neste primeiro partido de liga.
Tamén é certo e de todos coñecidos, que este equipo nunca estivo aliado coa fortuna que ás veces atopan outros equipos que mostran un nivel de xogo bastante inferior ao noso.
De todos os xeitos o equipo deixounos boas sensacións e seguro que irá progresando ata alcanzar ese bo xogo e ese espírito combativo polo que se caracteriza cada tempada.
Aínda faltan por chegar á disciplina do club algunhas incorporacións máis, que darán máis alternativas e solidez ao grupo.
Tal e como diciamos cando despedimos a tempada pasada, cada ano resulta máis difícil sacar a competir un equipo en cada categoría. A falta de medios económicos e dunha infraestrutura base que permita dar continuidade aos equipos, fan que sexa isto unha misión case imposible.
De todos os xeitos aínda quedan persoas altruístas e xogadores tan comprometidos co escudo que defenden, que fan que o club siga vivo un ano máis.
A pesar que o presidente apura as súas xestións ata o último segundo para acabar de formar o equipo de xuvenís que este ano tamén pretendemos manter, cremos que vai ser unha tarefa moi difícil aínda que non imposible.
De momento estamos vivos, e por iso imos loitar como todos os anos por dar o máximo posible en todas as competicións nas que participemos.
Todos os que formamos parte desta gran familia do Bodegón sabemos o que é sufrir e o que custa cada vitoria.
No hay comentarios:
Publicar un comentario